飞云浦
娘舅赋
星期五 九月 30, 2016 2:37 pm
陈宰庭唱：
我是千百条门路条条都走过，
到如今只重衣衫勿重人。
（对金秀英，白）小姐，侬真是有所不知啊！
我门前缚起高头马，
叫勿是亲来啊是亲，
我门浪遮了破帘子，
嫡亲格娘舅变外头人。
叫前十年我伲陈家铜钿有，
迭格亲眷朋友好象出龙灯，
到年初三清早晨，
我外甥到娘舅家中拜新春。
我是高头白马骑一匹，
后头还有书僮跟。
我是头浪帽子金钱顶，
箭衣外套簇崭新。
前头要用挑盘担，
迭格后头要用十箩群。
行来已到娘舅场角浪，
早有书僮去报信，
伲娘舅听见外甥到，
伊是轧轮轮轮开大门，
接进堂咾接进厅，
表兄表弟亲自来送香茗，
叫舅妈听见外甥到，
伊是厨房办酒立砧墩，
摆起了十六碗菜一桌酒，
叫吃啊吃啊请啊请，
娘舅过来洒洒（斟斟）酒，
迭格舅妈过来搛荤腥。
吃酒吃到半中后，
伲表兄弟要伴我着着骰子散散心。
我说到出门未带白相本，
迭格舅妈听见往里行，
开口五十借一百，
说外甥啊，
侬用格一头两年勿要紧，
勿要利钿只要本还本。
当初辰光陈家亲眷侪要好，
是想勿到十年以后变了心。
如今是伲陈家家穷落，
我再要到娘舅家中借花银，
是阿勿有啥高头马，
后头呒没书僮跟，
我头浪帽子开花顶，
青布衣裳碎纷纷，
有格地方千重补，
呒没地方肉憐憐，
叫前头呒没挑盘担，
迭格后头呒没十箩群。
行来已到娘舅场角浪，
啊有旁人去报信，
唉，伲娘舅听见外甥到，
伊是乒乒乓乓关大门，
撑头要撑十几根，
迭格贼偷强盗打勿进。
叫前门勿能走，
我只能走后门，
挨门进勒自得凳，
炒冷饭我自家盛，
迭格老韭菜勿嫌老来只当嫩,
不提借铜钿,
格末吃顿便点心,
话咾提起仔借铜钿，
伲舅妈立刻把火生，
碰薄刀咾甩砧礅，
打鸡捉狗骂闲人，
表兄拿我赶出门，
表弟拿根门闩掠脚跟，
故所以我借勿着啥半毫分。
如此看来穷人实在穷勿得，
我是今生迪世难超生，
除非到田鸡出毛猪出角，
黄狗出角变麒麟。
我心里越想越是气，
恨勿得立刻回转门，
东也掯来西也寻，
寻出一张龙凤金玉帖，
立刻送到金家门，
还拔伲表妹金秀英。
请使用以下网址来引用本篇文章:
http://coviews.com/trackback.php?e=16190
酷我-北美枫 首页
-> Blogs(博客)
-> 飞云浦
-> 娘舅赋
|
|
|