酷我-北美枫

[主持]

说明：我目前的兴趣是写苏州评弹脚本。这是我所创作的第一部短篇。未经作者本人允许，请勿转载。


短篇评弹《遇仙记》系根据蒲松龄聊斋志异吴门画工创作而成。


——建议安排单档演出此短篇评弹，当然根据剧团具体情况也可安排双档。


（说表）清朝顺治十四年间。就勒浪我伲苏州地界吴门有一格画工，姓朱，就是伲评弹界琴调创始人朱雪琴老前辈格朱——阿作兴是俚祖浪向啥人呢，现在已经搞弗清爽哉。为啥呢？因为迪格画工格名字弗曾传下来歇。大家只是叫俚朱司务。

朱司务既然是格画工末，格末俚究竟画点啥末事呢，叫啥画格既弗是山水也弗是花草既弗画啥扇面也弗画啥补壁。一般格人是想弗着格，阿晓得俚画格乃是“喜容”。格末啥叫啥喜容呢，翻译成为近代格语言就是遗像。

要是摆勒浪现在格辰光，格是便当煞格事体。用弗着请啥画工！有老早就准备好格标准像拿一张出来就是！讲到标准像，格弗是大老倌伊拉专用格，啊？现在平常草根百姓人家也有准备好格。就是我伲一条弄堂里厢有位老太九十开外年纪，勒浪八十大寿做生日格辰光就顺便拍了交交关关格黑白照片横拣竖拣拣仔一张出来末放大准备到辰光好挂勒浪墙头浪向。自家先看中意哉。还有种人就是碰着仔恶时辰，突然亡故来弗及照相也弗要紧格。寻一张原先有勒浪格照片去翻拍放大就一切舒齐。

不过闲话要讲转来，勒浪清朝顺治年间是唔拨啥照相迪种事体。就算是后来我伲中国人见识到照相机也要到慈禧太后格朝代再有。拍仔姜文格一部电影“阳光灿烂的日子”封为影帝格夏雨就有一部电影叫做“西洋镜”大家弗晓得阿曾看过歇？迪格西洋镜末就是照相机。从顺治到光绪，当中横里隔脱仔好几代皇帝，所以末市场需要朱司务迪能样子格专业画工来画喜容。

喜容喜容也就是遗像，交关重要。现在讲起来末追悼会浪要摆一张，屋里厢要挂一张，就是做好格坟墓格石碑浪向有种人家也欢喜化眼代价刻俚一张。不过勒浪清朝格辰光，顶顶要紧顶顶要紧格是勒浪斋祖宗亡人格辰光一定要有一张喜容。大正月里从年三十夜请出神像来一直到正月十七送神为止，总共十八天。早也供夜也供，格格名堂经叫做朝夕上祭。伊歇辰光强调“万恶淫为首百善孝为先”，大家统统当一桩大事体，实在推板弗起。

格喜容呢，也弗是像现在迪能单单一格头像。是要全身象格。弗相信，大家只要回想一想——唐国强主演格电视连续剧“贞观长歌”里厢凌烟阁开国功臣格画像一张一张全部是全身像！或者耐阿要讲迪格是唐朝，格末再看“雍正王朝”——里厢格祖宗亡人一格格也是全身像。

所以讲，朱司务格生意来得格好。为啥？一则来全身像要比头像花辰光花功夫，一进一出迪格工钿浪向上落弗少。二来末朱司务技术好，一级，方圆百里有名气四乡八镇大家要请朱司务。好像现在格明星奥斯卡最佳摄影师能吃响。格奥妙勒浪啥场化呢？讲穿仔末，关键是朱司务画出来格喜容让大家看了舒服。江南一带格地方有一格方言用词叫做死腔——就是讲死下来格腔调总归推板，弗好看。所以叫做死腔死腔。要画得后生小辈亲亲眷眷大家满意，格手里厢功夫弗是一眼眼哦。

朱司务弗单单是技术好，人品也好。弗嫖弗赌也弗吃香烟弗吃老酒，收费合理公道信得过。只是有一样，弗大地道——迷信。俚耐欢喜画八洞神仙吕纯阳吕祖格画像，屋里厢是墙头浪向一张张挂满。有格画成豪气冲天格剑侠形象，有格是文质彬彬格文士形象。偶像偶像，迪格就叫做偶像！吕洞宾就是朱司务格偶像，崇拜啊，崇拜得弗得了。

平常大家看得最多格是拜观世音。倒弗大看见供吕纯阳。其实，《聊斋志异》格作者蒲松龄老先生就曾经说过：“故佛道中惟观自在（就是观世音），仙道中惟纯阳子（就是吕洞宾），神道中惟伏魔帝（就是关老爷）”。佛道仙道神道三家格代表人物。格是另外一种三个代表。朱司务就是相信吕纯阳，是俚格忠实信徒。拿现在流行格闲话来讲嘛——弗是迷非著名相声演员郭德刚格钢丝而是铝丝。

朱司务弗单单是勒浪墙头浪贴满吕纯阳格画像，而且是勒浪心里向时时刻刻思念仔格祖师吕纯阳。朱司务迪种行当忙格辰光么忙煞，空下来格辰光倒也蛮多。俚耐一空下来就是去走街串巷，不过弗是去跑花街柳巷，而是一门心思想着阿有啥格机会碰得着吕祖格真身下凡。为啥俚要有迪格念头呢？为来为去为仔吕洞宾迪格仙人与众不同。别人家登勒浪仙山海岛修仙炼道，俚叫啥欢喜游戏人间。长早要到十丈红尘来白相相。大家总听说过格——吕洞宾飞剑斩黄龙；吕洞宾醉酒岳阳楼；倒还有来——吕洞宾三戏白牡丹。虽然说苏州弗是啥湖南岳阳河南洛阳，但是，讲弗准足啊，说弗定有朝一日吕仙会得降临姑苏迪格风流繁华地富贵温柔乡。

今早仔天气蛮好，手头浪向画喜容格任务老早结束。横竖一格人，吃饱仔肚皮全家弗饿。锁好房门出去兜兜。走大街串小巷，走到迪格场化，是郊外格一座破庙。庙末是破着点，不过原来倒是一座古刹。香火曾经蛮旺盛，后来破败脱仔拨拉一群叫花子占据作为伊拉登身格场所。

朱司务一看末，格是要进去看看交格。说弗定原先供格就是吕祖，正好去磕脱两格头，祷告祷告。认认地方下趟点再带仔香烛来好正式参拜。踏进庙门到得佛堂浪向一看末，弗是道观是佛寺。到底是啥格一位菩萨末也已经弄得面目全非。弗曾有啥住持知客，倒有一班叫花勒浪狼吞虎咽。虽然是剩菜残羹，吃得邪气开心。朱司务为人倒从来弗曾有啥等级观念——为啥呢？俚喜容画得多仔末想得穿——踏破千年铁门槛终须一个土馒头。随便耐是啥皇帝丞相叫花强盗，到阎罗王面前一视同仁。所以说勒浪金庸格笔下头，东邪西毒南帝北丐格南帝搭仔北丐是同等级别格。

朱司务就是以平常心来看待迪帮穷叫花，正勒浪想阿要施舍一眼小铜钿做做好事格辰光——格歇辰光弗曾有啥格“壹基金”，慈善事业是个体行为。哪能晓得眼睛里厢扫着一个人，心里厢会得一动。再仔仔细细定睛一看末，啊？！只见叫化堆里有一位身高八尺二寸，皮肤淡黄色，蛮和善格一张面孔，稍微有一点点麻不过一眼弗影响心目当中偶像格风度，三茈牙须越加显得神采轩豁。特别是一双眼睛炯炯有神晶光四射。朱司务是格画工，俚懂格——眼睛是心灵格窗户，迪能一双眼睛绝对弗会是生勒浪普通人身浪向格。阿是吕祖俚晓得我今朝会得到此地来，特地游戏人生等勒里迪座庙里厢啊？叫啥一格人啊，有种事体弗好多想，多想仔末越想越钻到牛角尖里。迪格赛过旅游格辰光，格导游对旅客讲，大家来看啊包捺弗看弗像看了就像叫啥越看越像。何况朱司务是格铝丝，越加着迷。

朱司务现在格心里厢啊真是喜心翻倒。实在是心诚则灵，今朝总算拨我碰着哉——真叫做皇天不负苦心人。三步并作两步走上去，双膝跪倒，一面拜仔几拜一面口中言道：弟子叩见吕祖。格格心目当中格吕祖倒弗曾开口，旁边格一群叫花子统统捧腹大笑——有格甚至于连得刚刚吃下去格冷粥冷饭也喷仔出来。

朱司务心里有数格，迪格是勒浪考验我啊。我一定要经得起考验格啊。又拜仔几拜末抬头对仔吕仙讲：今朝总算拨我碰着仙人哉。仙人啊，请收下我做耐格徒弟吧。又是一阵罗嘈。仙人俚倒是只管弗开口。

只要弗开口，神仙难下手。偏偏碰着仔朱司务，俚迪格人叫啥像仔“士兵突击”里格许三多，认煞一条理偏弗肯回头。只管一面叩头一面喊师父。人家又弗曾收俚做徒弟，俚倒死人弗怪先叫上去再讲。

格仙人只管弗理弗睬。俚拿格身体别到东，朱司务人就转到东去磕头；俚再拿格身体别到西，朱司务也就转到西去磕头。看样子，今朝仔蚂蟥叮牢鹭鸶脚——弗肯罢休哉。

想弗到倒仔几格来回末，仙人总算开仔金口哉。只见迪格叫花子一只右手勒浪牙须浪向一撸，开口言道：“我即吕祖，汝将奈何？”

朱司务格格心里开心啊，马上接腔——吕祖在上，容弟子禀告。
（弹唱）
我末早也思来末晚也想，
心心念念想着耐格祖师吕纯阳。
我从小就拿祖师来崇拜，
耐格画像我是末画仔几几化化张。
挂满东墙挂西墙，
再挂南墙和北墙。
自家屋里挂弗落，
各处散发送街坊。
从观前街一直送到仔末阊门外，
再加上来来往往运河格航船浪。
（说表：摆到现在格辰光，真可以组织起来一个粉丝团！）
屋里向是——
日日夜夜来祝告，
朝朝暮暮烧高香。
天底下格“铝丝”称头名，
算得上是最最虔诚一画匠。
今早有幸得遇耐仙师面，
也是我心诚则灵有名堂。
我情愿拜在仙人名下当弟子，
我情愿跟仔祖师云游背药箱。
弗贪求啥点铁成金格手指头，
迪种铜臭念头我从来未曾想。
（说表：有一个故事格，一格人也是碰着仔吕仙末，问俚想要啥，俚倒说就要耐一只点铁成金格手指头，结果偷鸡弗着蚀把米拨拉吕仙狠狠叫教训仔一顿。）
我弗求高官厚禄立朝堂，
到头来原是黄粱梦一场。
（说表：老早就听说格，吕仙俚自家拨拉汉钟离点化，就是因为仔一枕黄粱梦醒。做官做官，做到仔出将入相结果原本回到老路浪向。）
我弗想洞房花烛成双对，
红绡帐内端正好一位女娇娘。
（说表：四大皆空，色即是空，色空色空，格是好好叫比李安格色戒要高几格层次得来。）
敬仰祖师法术广，
闻说海上有仙方。
祈求师父发慈悲，
但求能够如愿尝。
只要一粒长生不老仙丹药，
让我永远弗会得去见阎王。
（说表：迪格人是弗好搭俚去碰头格。）
弟子我若能免一死，
就可以始终追随在你身旁！
（说表）迪格要求弗算过分，我想长生不老，也是为仔能够追随左右，搭耐有伴，弗是单单为仔我自家哦。其实末，朱司务帮人家画喜容，看惯仔世态炎凉人情冷暖。对人生酒色财气末有一点点想穿，只怕一桩事体。怕就是怕自家有朝一日也会得要有一张喜容。逃弗脱格，故所以末提出迪能样子一格要求。现在要求提末提出来仔，弗晓得吕祖有啥格反应。阿会得也是碰着一鼻头格灰噢。

（说表）朱司务说完仔末，一只头骷颅仰起仔望好仔吕仙勒浪等。迪帮叫花子又是一阵大笑。叫花子当中只有一个人弗笑，啥人呢？就是吕仙吕纯阳。只见得俚朝旁边走开仔几步，对朱司务招招手，隐隐然耐跟仔我来醸。朱司务赶紧立起身来，跟屁虫能跟牢仔吕仙到仔佛堂格一个角落头。两格人停下来，吕仙对朱司务再招招手。格意思是“附耳过来”。朱司务心里向开心啊，格是搭仔孙悟空拜师传道格辰光一式一样。豪臊耳朵凑上去，只听得仙师用低音勒浪说：“既然是耐能够认得出我末，看来我搭耐还是有缘格。不过，这里不是说话的所在，夜间自当相见。”

迪歇辰光，迪能一句说话听见仔勒浪朱司务格耳朵里向，格格心里向开心啊阿赛过六月里喝仔一碗冰糖水，哪哼？——叫做阴到骨里甜到心！正要开口表示感谢格辰光，啥叫啥眼睛一霎老母鸡变鸭，就勒浪眼门前格吕仙人弗看见哉。啊？！格么真格是神仙，一点弗错啊是仙人。再一想末，啊呀，我还弗曾晓得夜里向碰头是勒浪啥地方介？

朱司务一阵发呆，稍微清醒过来再两只眼睛捻一捻，看过来看过去一群叫花堆里根本看弗见有仙人哎。也用弗着再勒浪此地登下去哉。回到自家屋里，饭也吃弗落茶也喝弗进，一门心思勒浪等吕祖降临。

外面起更哉。等过一更天，又是二更天。过了二更天，就是三更天。本生仔倒蛮有信心，宁可信其有不可信其无，到三更敲过倒真格有点神思恍惚心里向疑仔疑惑。埂转一想末，弗好对仙师有疑心格。阿是好迪能样子，格是忠心弗够，赶快拿格心神定一定。硬撑精神继续勒浪等下去，狠弗得拿两根木签子来拿格眼皮支起来。

敲四更天哉，依然是一点音讯全无。做过夜班格人晓得格，迪歇辰光最最熬人。正勒浪神困思倦欲寻好梦之际，一道金光，照亮满房间。仙人来哉，朱司务精神大振困意全消，赶紧伏地磕头。磕好头起身瞻仰仙姿——啊，完完全全搭仔自家画格“纯阳真人像”一般无二。头戴方巾，身穿海青，足下云履，腰系朱红丝绦，背浪向斜插一把伏魔宝剑，一张白净的长隆面孔，三绺青须，好一派仙风道骨！

朱司务耐末定心哉——啥叫啥仙人呀，仙人是弗会失信格。到底是我一片虔诚之心感动得吕祖下凡降临到我迪间房子里来。只管等勒浪仙人从道袍格袍袖里向拿出一粒仙丹吞下去耐末大功告成。

吕祖开口哉。“念子志虑专凝，特来一见。但汝骨气贪吝，不能为仙。我使见一人可也。”格是文言文呀，迪格意思末是讲看勒浪耐志诚之心，特地来见上一面。不过嘛，耐格骨相太俗过于贪图吝啬，是弗能够位列仙班格。隔末实能吧，我来让耐见上一格人。

朱司务心里向一沉，想啥？我要讨一粒仙丹是非分之想？！看来长生弗老是弗会得有戏哉。弗晓得要引见一格啥人啊？只看见吕仙袍袖一扬，异香满室。空中一朵祥云冉冉而降。到底仙人呀，墙头房顶是挡弗牢格。祥云浪向立好仔一位丽人，大约三十岁模样，正是一朵鲜花盛开格光景。身浪向全副宫妆打扮，头浪云髻高耸，仪态万方还加是落落大方。朱司务只敢用眼梢甩过去瞄一眼，格种漂亮是一种叫人不敢逼视偏偏又舍弗得看格腔势。

格位美人降落云端立定身躯含笑不语。仙人倒又开口哉：“这一位便是董娘娘，你要看仔细了。”

朱司务一听末求之不得。本来有点弗敢有点弗好意思，现在过仔明路，仙人关照格，格是任务呀。朱司务听仔吕仙吩咐，耐末抬起眼睛仔细打量饱看一番。啊呀！隔末真叫做马玉涛唱格一支歌里向格一句——看也看弗够哉。
（弹唱）
云端落下仔格一位董娘娘，
九天仙女也只及俚脚跟头。
耐看俚要比西施胖，
耐看俚还比玉环瘦。
耐看俚再比貂蝉白，
耐看俚更比昭君柔。
（说表：格是拿四大美女统统比下去哉。）
真要教月里嫦娥偷落泪，
真要叫海底龙女暗害羞。
增之一分嫌忒过，
减之一分欠运筹。
迪能标致格面孔何处找？
迪能匀称格身段落里求？
最最喜气是俚格怡然含笑样，
让我伲凡夫俗子也敢往前凑。
浑身上下弗见骄娇二气存，
眉梢眼角只有甜情蜜意透。
若是能搭俚共度春宵一夜天，
（说表：现在叫做419——for one night。）
哪怕是牡丹花下死做鬼也风流！
阿有啥更夫耐五更钟点晏歇敲，
阿晓得我是看也实在叫是看弗够！（备注：最后半句可以考虑采用马玉涛歌曲演唱时的落腔拖腔。如决定采用此建议则末句改为——阿晓得我实在是看也看不够。同时可再接一句说表：倒惹俚唱起“马儿啊，你慢些走”来哉。）

（说表）迪歇辰光，啥格色戒色空啦弗敢去见阎王啦统统拨拉朱司务丢到仔九霄云外——格格末就叫做色胆包天，不可抗拒格诱惑。朱司务是格画工呀，阅人之多看过格人是弗弗少少。倒是从来弗曾看见过歇迪能格一格女人！弗单单是漂亮，而且俚一双眼睛生得好极——大凡漂亮格女人骄娇二气在所难免，为啥呢？俚笃清爽自家格身价总归要流露出来一副与众弗同格样子。但是，迪位董娘娘俚弗！耐弗管啥人，望过去只会觉得亲近。就像是看见仔自家格亲娘自家格阿姐。大家倒想想看，一个绝色美女，又有仔耐亲娘格慈祥阿姐格关怀但是亦弗是耐亲娘阿姐弗会得乱伦格，迪种样子格三结合假使再加上仔顶尖格床浪功夫末实在是天浪少有人间绝无！

正勒浪朱司务情不自禁痴心妄想格辰光，只见董娘娘掩口莞尔一笑。迪格当口，耐董娘娘好笑格？朱司务本来已经人木脱格哉，再拨耐一笑百媚生格是要颠倒众生。正勒浪朱司务弗晓得自家阿要蠢蠢欲动阿会得做出啥越轨行为格辰光，只觉得一样物事黑乎乎格扑面而来。“啪”格一记，阿壳张吃仔一记耳光呀。低头一看末，地浪向自家格一本画册。抬头一看末，祖师面色铁板显露不悦。晓得自家心动神知，格是瞒弗过仙人格。所以要吃生活，格是惩罚我非分之想。再定睛一看末，叫啥董娘娘已经影踪全无。

仙人面孔板板，又开出口来：董娘娘的面容，可记得否？朱司务想，我倒想讲还弗曾看明白拉里，阿好让我再看看。自家晓得格是弗可能格，就老老实实恭恭敬敬回答一声：是格，已经记明白了。格末就叫做朱司务格本事——一级画工呀。

“当真？”

“当真。”

“既然如此，你且听了——天亮之后你速将董娘娘画像完工，待等三年之后携带进京自有效验。”

朱司务正要想问阿有啥等样格效验呢，只见吕仙说完要走，急忙上前想要拦牢问问清爽末，阿晓得一脚踏空。再一看末，自家复回尘世，原来是南柯一梦。

梦虽然醒哉，不过人仍旧勒浪梦里头弗肯退出来呀。耐看，一本画册明明是勒浪地板浪向躺好仔点。想起仔吕仙关照格任务，仔仔细细回想一番董娘娘的音容笑貌服饰打扮，面孔也弗揩早饭也弗吃马上台子摊开来，笔墨端正好。用用心心一口气拿迪张画像画好。自家看看觉得正称得上得意之作。为啥呢？一是用心，功夫化仔下去！二是上劲，欢喜做格事体搭仔为仔柴米油盐开伙仓当然是绝然弗同。画末是画好仔，倒是弗敢挂出来，只好勒浪夜深人静格辰光有趟把从箱子里拿出来看看过过干瘾。秀色可餐，看看也好格啊。

一等等仔三年。朱司务牢牢记住吕祖格关照，一到辰光收摊打烊。对别人只讲要出门去旅游。别人也弗晓得究竟会有啥花样经，想来俚赚够仔银子末，动仔游兴哉。

朱司务一路搭乘运河航船到通州上岸。有任务在身，也弗敢去想啥格顺带便游山玩水。格格一日到仔京城，落脚勒浪苏州会馆。

自家也弗晓得到底仙人要俚迪歇辰光到京城来作啥。不过，人既然已经来格哉——既来之则安之。倒也定定心心。准备明朝去打听打听琉璃厂什刹海大栅栏哪哼格走法，可以安排安排一个旅游计划。前清格歇辰光，皇宫——现在叫故宫搭仔圆明园（现在格圆明园废墟）还有天坛等歇场化老百姓是弗允许进去格。

阿壳张第二天一早起来，苏州会馆里向大家议论纷纷。在勒浪讲非比寻常格一桩事体——顺治皇帝格皇贵妃董鄂氏不幸因病仙逝。本来嘛，后宫里向死脱个把女人谈弗上是啥大事体，也弗是贵为国母格皇后娘娘。

朱司务耳朵半边豁着一个董字嘛，倒着进耳朵哉。啊？！阿会得是董娘娘介？！耐末弗去打听啥格琉璃厂什刹海大栅栏哉。竖好仔格耳朵仔仔细细格听下去。

（弹唱）
叫啥子末希奇希奇真希奇，
格桩事体前朝六代未曾闻。
迪位董鄂氏出身秦淮河，
（说表：原来俚乃是秦淮八艳之一。）
董小宛三字名气响得来斜斜能。
辗转进入皇宫内，
太后身旁侍晨昏。
少年天子偶得遇，
一见倾心惊天人！
从此君王有知音，
心心相印共鸳枕。
（说表：有仔红颜知己哉，“长信宫中，三千第一”“昭阳殿里，八百无双”。）
真是六宫粉黛无颜色，
三千宠爱在一身。
谁知天不从人愿，
膏盲之疾临宫门。
不幸一病身亡故，
多情皇上哭断魂。
千呼万唤唤不归，
“端敬皇后”来追尊。
（说表：叫啥前朝崇祯皇帝辰光出仔一格扬州瘦马田贵妃，现在超出，秦淮歌妓当中出仔一个皇后娘娘！）
惟有一事为遗憾——
未有画像伴余生。

（说表）格格皇帝啊，除开议定镒号孝献庄和至德宣仁温惠有十格字之多，别样格脑筋挖空心思动出来全部办得到，葬礼要多少隆重就办到多少隆重。董娘娘黄泉之下要人服侍，三十名宫女太监殉葬，格是残酷啊。要有地方住，专门盛饰奇珍异宝格一座精舍付之一炬。迪格就是满洲贵族丧葬习俗里格“大丢纸”。还弗算数， “大丢纸”之外还有“小丢纸”——就是拿董娘娘生前睡眠服御之物统统烧脱。桂圆大格珍珠指头大格宝石尽皆焚化。一眼眼也弗肉痛哎。

但是，就是有一桩事体嘛，铜钿银子再多也唔没办法可想。就是董娘娘格喜容唔拨着落。董娘娘生前也弗曾留下来啥格画像。耐末只好想格极办法——叫董娘娘生前所住承乾宫里弗曾殉葬格宫女太监统统召集勒一道提供信息，再汇集京城有名气格画工大家一道来根据提供格信息来描画。阿有啥就像仔公安局里画嫌疑犯一式一样哉。

一眼弗错，格末也像仔公安局画嫌疑犯是弗可能画得像到落里去格。耐倒想想看，大家七嘴八舌，迪格讲眉毛要迪能弯过来，伊格讲眼睛要格能瞄过去。耐是苦煞仔迪班画工，也弗好罢工格。偏偏是好弗容易大多数人讲蛮像哉，皇帝跑过来一看，仍旧弗称心呀。气得皇帝发闲话——再画弗好，要对捺弗起哉。承乾宫里是一片哀号，弗晓得画画迪种事体越急越弗来三。眼看是要唔不戏唱哉。

朱司务听仔末，耐末开心啊。原来吕祖掐算阴阳老早就晓得董娘娘寿限，三年之前就安排好哉。格是便当煞格，画箱里拿出来就是！完成仔吕祖交待的任务，同时也是做桩救苦救难格好事体。倒是要打听一条路子，自家是弗好直逼逼到金銮殿去见皇上格。

朱司务一打听嘛，倒是凑巧——奉旨根据“御制端敬皇后行状”写传记格金三俊金中堂也是苏州地界吴江人。通过仔格苏州会馆到金中堂府浪，金大人一听之下就讲：豪臊拿出来瞻仰瞻仰。一见之下耐末确实相信。为啥？迪幅画像有灵气格，顾盼自如栩栩如生活脱活像一格活人立勒浪面前。再一想末，还有吕洞宾吕仙格指点，绝对放心好哉。迪格事体弗好寻开心呀。万一送上去，一眼弗像格是惹毛皇帝弗得了呀。现在定心哉。

果然弗出所料，金三俊拿董娘娘格画像上呈御前，皇帝一看末破涕为笑，惊喜莫名。马上传示六宫，叫啥唔不一格人表示疑义，异口同声讲像，像，像得弗得了啊！

其实末，耐皇帝老倌已经讲仔像末老早通过哉，大家顺水推舟何必说弗呢。马上顺治传旨重赏朱司务。赏格是“奉特旨授为内阁中书”——内阁中书是可以参与机务格，有权柄格。啥人晓得朱司务并弗领情呀，对来传旨格金三俊讲要辞官弗做——理由便是“弗懂得哪哼做官”。倒也有道理呀，其实俚耐自家有数，做官啥介好做格？弗要爬得高跌得重！

金三俊晓得俚格心思，自家替皇帝办好迪件大事体也是朱司务格来头格是无论如何要帮伊忙格。明朝早朝格辰光，上朝宛转对皇帝讲仔朱司务只求富弗求贵格心思，皇帝照准。改赏一万两银子拨拉朱司务。

朱司务得到格实惠还弗仅仅是到此为止。衣锦荣归外加还有四个字——就是前一腔一档电视节目格名称——名声大振。弗论远近特别是有铜钿有身价格人家板要来请朱司务，酬金还要别苗头。为啥么？皇帝出仔一万两银子，我伲出弗到一万，打格一折末起码起码也要出到一千。有格再往上抬抬末，快煞仔哎，弗到半年润笔之资已经今生迪世用弗光哉。

朱司务就此歇业，搭仔俚格恩公吕仙一样云游四方。据蒲松龄老先生讲勒浪山东莱芜有一位朱拱奎曾见其人。究竟哪哼，尚有待考证。

短篇到此结束。请听下档。
_________________
是非是，我非我。

敬请光临我在北美枫的博客飞云浦

也请关注我的新浪博客
http://blog.sina.com.cn/u/1740799031

[[Bob]]

说明：我目前的兴趣是写苏州评弹脚本。这是我所创作的第一部短篇。未经作者本人允许，请勿转载。


短篇评弹《遇仙记》系根据蒲松龄聊斋志异吴门画工创作而成。


——建议安排单档演出此短篇评弹，当然根据剧团具体情况也可安排双档。


（说表）清朝顺治十四年间。就勒浪我伲苏州地界吴门有一格画工，姓朱，就是伲评弹界琴调创始人朱雪琴老前辈格朱——阿作兴是俚祖浪向啥人呢，现在已经搞弗清爽哉。为啥呢？因为迪格画工格名字弗曾传下来歇。大家只是叫俚朱司务。

朱司务既然是格画工末，格末俚究竟画点啥末事呢，叫啥画格既弗是山水也弗是花草既弗画啥扇面也弗画啥补壁。一般格人是想弗着格，阿晓得俚画格乃是“喜容”。格末啥叫啥喜容呢，翻译成为近代格语言就是遗像。

要是摆勒浪现在格辰光，格是便当煞格事体。用弗着请啥画工！有老早就准备好格标准像拿一张出来就是！讲到标准像，格弗是大老倌伊拉专用格，啊？现在平常草根百姓人家也有准备好格。就是我伲一条弄堂里厢有位老太九十开外年纪，勒浪八十大寿做生日格辰光就顺便拍了交交关关格黑白照片横拣竖拣拣仔一张出来末放大准备到辰光好挂勒浪墙头浪向。自家先看中意哉。还有种人就是碰着仔恶时辰，突然亡故来弗及照相也弗要紧格。寻一张原先有勒浪格照片去翻拍放大就一切舒齐。

不过闲话要讲转来，勒浪清朝顺治年间是唔拨啥照相迪种事体。就算是后来我伲中国人见识到照相机也要到慈禧太后格朝代再有。拍仔姜文格一部电影“阳光灿烂的日子”封为影帝格夏雨就有一部电影叫做“西洋镜”大家弗晓得阿曾看过歇？迪格西洋镜末就是照相机。从顺治到光绪，当中横里隔脱仔好几代皇帝，所以末市场需要朱司务迪能样子格专业画工来画喜容。

喜容喜容也就是遗像，交关重要。现在讲起来末追悼会浪要摆一张，屋里厢要挂一张，就是做好格坟墓格石碑浪向有种人家也欢喜化眼代价刻俚一张。不过勒浪清朝格辰光，顶顶要紧顶顶要紧格是勒浪斋祖宗亡人格辰光一定要有一张喜容。大正月里从年三十夜请出神像来一直到正月十七送神为止，总共十八天。早也供夜也供，格格名堂经叫做朝夕上祭。伊歇辰光强调“万恶淫为首百善孝为先”，大家统统当一桩大事体，实在推板弗起。

格喜容呢，也弗是像现在迪能单单一格头像。是要全身象格。弗相信，大家只要回想一想——唐国强主演格电视连续剧“贞观长歌”里厢凌烟阁开国功臣格画像一张一张全部是全身像！或者耐阿要讲迪格是唐朝，格末再看“雍正王朝”——里厢格祖宗亡人一格格也是全身像。

所以讲，朱司务格生意来得格好。为啥？一则来全身像要比头像花辰光花功夫，一进一出迪格工钿浪向上落弗少。二来末朱司务技术好，一级，方圆百里有名气四乡八镇大家要请朱司务。好像现在格明星奥斯卡最佳摄影师能吃响。格奥妙勒浪啥场化呢？讲穿仔末，关键是朱司务画出来格喜容让大家看了舒服。江南一带格地方有一格方言用词叫做死腔——就是讲死下来格腔调总归推板，弗好看。所以叫做死腔死腔。要画得后生小辈亲亲眷眷大家满意，格手里厢功夫弗是一眼眼哦。

朱司务弗单单是技术好，人品也好。弗嫖弗赌也弗吃香烟弗吃老酒，收费合理公道信得过。只是有一样，弗大地道——迷信。俚耐欢喜画八洞神仙吕纯阳吕祖格画像，屋里厢是墙头浪向一张张挂满。有格画成豪气冲天格剑侠形象，有格是文质彬彬格文士形象。偶像偶像，迪格就叫做偶像！吕洞宾就是朱司务格偶像，崇拜啊，崇拜得弗得了。

平常大家看得最多格是拜观世音。倒弗大看见供吕纯阳。其实，《聊斋志异》格作者蒲松龄老先生就曾经说过：“故佛道中惟观自在（就是观世音），仙道中惟纯阳子（就是吕洞宾），神道中惟伏魔帝（就是关老爷）”。佛道仙道神道三家格代表人物。格是另外一种三个代表。朱司务就是相信吕纯阳，是俚格忠实信徒。拿现在流行格闲话来讲嘛——弗是迷非著名相声演员郭德刚格钢丝而是铝丝。

朱司务弗单单是勒浪墙头浪贴满吕纯阳格画像，而且是勒浪心里向时时刻刻思念仔格祖师吕纯阳。朱司务迪种行当忙格辰光么忙煞，空下来格辰光倒也蛮多。俚耐一空下来就是去走街串巷，不过弗是去跑花街柳巷，而是一门心思想着阿有啥格机会碰得着吕祖格真身下凡。为啥俚要有迪格念头呢？为来为去为仔吕洞宾迪格仙人与众不同。别人家登勒浪仙山海岛修仙炼道，俚叫啥欢喜游戏人间。长早要到十丈红尘来白相相。大家总听说过格——吕洞宾飞剑斩黄龙；吕洞宾醉酒岳阳楼；倒还有来——吕洞宾三戏白牡丹。虽然说苏州弗是啥湖南岳阳河南洛阳，但是，讲弗准足啊，说弗定有朝一日吕仙会得降临姑苏迪格风流繁华地富贵温柔乡。

今早仔天气蛮好，手头浪向画喜容格任务老早结束。横竖一格人，吃饱仔肚皮全家弗饿。锁好房门出去兜兜。走大街串小巷，走到迪格场化，是郊外格一座破庙。庙末是破着点，不过原来倒是一座古刹。香火曾经蛮旺盛，后来破败脱仔拨拉一群叫花子占据作为伊拉登身格场所。

朱司务一看末，格是要进去看看交格。说弗定原先供格就是吕祖，正好去磕脱两格头，祷告祷告。认认地方下趟点再带仔香烛来好正式参拜。踏进庙门到得佛堂浪向一看末，弗是道观是佛寺。到底是啥格一位菩萨末也已经弄得面目全非。弗曾有啥住持知客，倒有一班叫花勒浪狼吞虎咽。虽然是剩菜残羹，吃得邪气开心。朱司务为人倒从来弗曾有啥等级观念——为啥呢？俚喜容画得多仔末想得穿——踏破千年铁门槛终须一个土馒头。随便耐是啥皇帝丞相叫花强盗，到阎罗王面前一视同仁。所以说勒浪金庸格笔下头，东邪西毒南帝北丐格南帝搭仔北丐是同等级别格。

朱司务就是以平常心来看待迪帮穷叫花，正勒浪想阿要施舍一眼小铜钿做做好事格辰光——格歇辰光弗曾有啥格“壹基金”，慈善事业是个体行为。哪能晓得眼睛里厢扫着一个人，心里厢会得一动。再仔仔细细定睛一看末，啊？！只见叫化堆里有一位身高八尺二寸，皮肤淡黄色，蛮和善格一张面孔，稍微有一点点麻不过一眼弗影响心目当中偶像格风度，三茈牙须越加显得神采轩豁。特别是一双眼睛炯炯有神晶光四射。朱司务是格画工，俚懂格——眼睛是心灵格窗户，迪能一双眼睛绝对弗会是生勒浪普通人身浪向格。阿是吕祖俚晓得我今朝会得到此地来，特地游戏人生等勒里迪座庙里厢啊？叫啥一格人啊，有种事体弗好多想，多想仔末越想越钻到牛角尖里。迪格赛过旅游格辰光，格导游对旅客讲，大家来看啊包捺弗看弗像看了就像叫啥越看越像。何况朱司务是格铝丝，越加着迷。

朱司务现在格心里厢啊真是喜心翻倒。实在是心诚则灵，今朝总算拨我碰着哉——真叫做皇天不负苦心人。三步并作两步走上去，双膝跪倒，一面拜仔几拜一面口中言道：弟子叩见吕祖。格格心目当中格吕祖倒弗曾开口，旁边格一群叫花子统统捧腹大笑——有格甚至于连得刚刚吃下去格冷粥冷饭也喷仔出来。

朱司务心里有数格，迪格是勒浪考验我啊。我一定要经得起考验格啊。又拜仔几拜末抬头对仔吕仙讲：今朝总算拨我碰着仙人哉。仙人啊，请收下我做耐格徒弟吧。又是一阵罗嘈。仙人俚倒是只管弗开口。

只要弗开口，神仙难下手。偏偏碰着仔朱司务，俚迪格人叫啥像仔“士兵突击”里格许三多，认煞一条理偏弗肯回头。只管一面叩头一面喊师父。人家又弗曾收俚做徒弟，俚倒死人弗怪先叫上去再讲。

格仙人只管弗理弗睬。俚拿格身体别到东，朱司务人就转到东去磕头；俚再拿格身体别到西，朱司务也就转到西去磕头。看样子，今朝仔蚂蟥叮牢鹭鸶脚——弗肯罢休哉。

想弗到倒仔几格来回末，仙人总算开仔金口哉。只见迪格叫花子一只右手勒浪牙须浪向一撸，开口言道：“我即吕祖，汝将奈何？”

朱司务格格心里开心啊，马上接腔——吕祖在上，容弟子禀告。
（弹唱）
我末早也思来末晚也想，
心心念念想着耐格祖师吕纯阳。
我从小就拿祖师来崇拜，
耐格画像我是末画仔几几化化张。
挂满东墙挂西墙，
再挂南墙和北墙。
自家屋里挂弗落，
各处散发送街坊。
从观前街一直送到仔末阊门外，
再加上来来往往运河格航船浪。
（说表：摆到现在格辰光，真可以组织起来一个粉丝团！）
屋里向是——
日日夜夜来祝告，
朝朝暮暮烧高香。
天底下格“铝丝”称头名，
算得上是最最虔诚一画匠。
今早有幸得遇耐仙师面，
也是我心诚则灵有名堂。
我情愿拜在仙人名下当弟子，
我情愿跟仔祖师云游背药箱。
弗贪求啥点铁成金格手指头，
迪种铜臭念头我从来未曾想。
（说表：有一个故事格，一格人也是碰着仔吕仙末，问俚想要啥，俚倒说就要耐一只点铁成金格手指头，结果偷鸡弗着蚀把米拨拉吕仙狠狠叫教训仔一顿。）
我弗求高官厚禄立朝堂，
到头来原是黄粱梦一场。
（说表：老早就听说格，吕仙俚自家拨拉汉钟离点化，就是因为仔一枕黄粱梦醒。做官做官，做到仔出将入相结果原本回到老路浪向。）
我弗想洞房花烛成双对，
红绡帐内端正好一位女娇娘。
（说表：四大皆空，色即是空，色空色空，格是好好叫比李安格色戒要高几格层次得来。）
敬仰祖师法术广，
闻说海上有仙方。
祈求师父发慈悲，
但求能够如愿尝。
只要一粒长生不老仙丹药，
让我永远弗会得去见阎王。
（说表：迪格人是弗好搭俚去碰头格。）
弟子我若能免一死，
就可以始终追随在你身旁！
（说表）迪格要求弗算过分，我想长生不老，也是为仔能够追随左右，搭耐有伴，弗是单单为仔我自家哦。其实末，朱司务帮人家画喜容，看惯仔世态炎凉人情冷暖。对人生酒色财气末有一点点想穿，只怕一桩事体。怕就是怕自家有朝一日也会得要有一张喜容。逃弗脱格，故所以末提出迪能样子一格要求。现在要求提末提出来仔，弗晓得吕祖有啥格反应。阿会得也是碰着一鼻头格灰噢。

（说表）朱司务说完仔末，一只头骷颅仰起仔望好仔吕仙勒浪等。迪帮叫花子又是一阵大笑。叫花子当中只有一个人弗笑，啥人呢？就是吕仙吕纯阳。只见得俚朝旁边走开仔几步，对朱司务招招手，隐隐然耐跟仔我来醸。朱司务赶紧立起身来，跟屁虫能跟牢仔吕仙到仔佛堂格一个角落头。两格人停下来，吕仙对朱司务再招招手。格意思是“附耳过来”。朱司务心里向开心啊，格是搭仔孙悟空拜师传道格辰光一式一样。豪臊耳朵凑上去，只听得仙师用低音勒浪说：“既然是耐能够认得出我末，看来我搭耐还是有缘格。不过，这里不是说话的所在，夜间自当相见。”

迪歇辰光，迪能一句说话听见仔勒浪朱司务格耳朵里向，格格心里向开心啊阿赛过六月里喝仔一碗冰糖水，哪哼？——叫做阴到骨里甜到心！正要开口表示感谢格辰光，啥叫啥眼睛一霎老母鸡变鸭，就勒浪眼门前格吕仙人弗看见哉。啊？！格么真格是神仙，一点弗错啊是仙人。再一想末，啊呀，我还弗曾晓得夜里向碰头是勒浪啥地方介？

朱司务一阵发呆，稍微清醒过来再两只眼睛捻一捻，看过来看过去一群叫花堆里根本看弗见有仙人哎。也用弗着再勒浪此地登下去哉。回到自家屋里，饭也吃弗落茶也喝弗进，一门心思勒浪等吕祖降临。

外面起更哉。等过一更天，又是二更天。过了二更天，就是三更天。本生仔倒蛮有信心，宁可信其有不可信其无，到三更敲过倒真格有点神思恍惚心里向疑仔疑惑。埂转一想末，弗好对仙师有疑心格。阿是好迪能样子，格是忠心弗够，赶快拿格心神定一定。硬撑精神继续勒浪等下去，狠弗得拿两根木签子来拿格眼皮支起来。

敲四更天哉，依然是一点音讯全无。做过夜班格人晓得格，迪歇辰光最最熬人。正勒浪神困思倦欲寻好梦之际，一道金光，照亮满房间。仙人来哉，朱司务精神大振困意全消，赶紧伏地磕头。磕好头起身瞻仰仙姿——啊，完完全全搭仔自家画格“纯阳真人像”一般无二。头戴方巾，身穿海青，足下云履，腰系朱红丝绦，背浪向斜插一把伏魔宝剑，一张白净的长隆面孔，三绺青须，好一派仙风道骨！

朱司务耐末定心哉——啥叫啥仙人呀，仙人是弗会失信格。到底是我一片虔诚之心感动得吕祖下凡降临到我迪间房子里来。只管等勒浪仙人从道袍格袍袖里向拿出一粒仙丹吞下去耐末大功告成。

吕祖开口哉。“念子志虑专凝，特来一见。但汝骨气贪吝，不能为仙。我使见一人可也。”格是文言文呀，迪格意思末是讲看勒浪耐志诚之心，特地来见上一面。不过嘛，耐格骨相太俗过于贪图吝啬，是弗能够位列仙班格。隔末实能吧，我来让耐见上一格人。

朱司务心里向一沉，想啥？我要讨一粒仙丹是非分之想？！看来长生弗老是弗会得有戏哉。弗晓得要引见一格啥人啊？只看见吕仙袍袖一扬，异香满室。空中一朵祥云冉冉而降。到底仙人呀，墙头房顶是挡弗牢格。祥云浪向立好仔一位丽人，大约三十岁模样，正是一朵鲜花盛开格光景。身浪向全副宫妆打扮，头浪云髻高耸，仪态万方还加是落落大方。朱司务只敢用眼梢甩过去瞄一眼，格种漂亮是一种叫人不敢逼视偏偏又舍弗得看格腔势。

格位美人降落云端立定身躯含笑不语。仙人倒又开口哉：“这一位便是董娘娘，你要看仔细了。”

朱司务一听末求之不得。本来有点弗敢有点弗好意思，现在过仔明路，仙人关照格，格是任务呀。朱司务听仔吕仙吩咐，耐末抬起眼睛仔细打量饱看一番。啊呀！隔末真叫做马玉涛唱格一支歌里向格一句——看也看弗够哉。
（弹唱）
云端落下仔格一位董娘娘，
九天仙女也只及俚脚跟头。
耐看俚要比西施胖，
耐看俚还比玉环瘦。
耐看俚再比貂蝉白，
耐看俚更比昭君柔。
（说表：格是拿四大美女统统比下去哉。）
真要教月里嫦娥偷落泪，
真要叫海底龙女暗害羞。
增之一分嫌忒过，
减之一分欠运筹。
迪能标致格面孔何处找？
迪能匀称格身段落里求？
最最喜气是俚格怡然含笑样，
让我伲凡夫俗子也敢往前凑。
浑身上下弗见骄娇二气存，
眉梢眼角只有甜情蜜意透。
若是能搭俚共度春宵一夜天，
（说表：现在叫做419——for one night。）
哪怕是牡丹花下死做鬼也风流！
阿有啥更夫耐五更钟点晏歇敲，
阿晓得我是看也实在叫是看弗够！（备注：最后半句可以考虑采用马玉涛歌曲演唱时的落腔拖腔。如决定采用此建议则末句改为——阿晓得我实在是看也看不够。同时可再接一句说表：倒惹俚唱起“马儿啊，你慢些走”来哉。）

（说表）迪歇辰光，啥格色戒色空啦弗敢去见阎王啦统统拨拉朱司务丢到仔九霄云外——格格末就叫做色胆包天，不可抗拒格诱惑。朱司务是格画工呀，阅人之多看过格人是弗弗少少。倒是从来弗曾看见过歇迪能格一格女人！弗单单是漂亮，而且俚一双眼睛生得好极——大凡漂亮格女人骄娇二气在所难免，为啥呢？俚笃清爽自家格身价总归要流露出来一副与众弗同格样子。但是，迪位董娘娘俚弗！耐弗管啥人，望过去只会觉得亲近。就像是看见仔自家格亲娘自家格阿姐。大家倒想想看，一个绝色美女，又有仔耐亲娘格慈祥阿姐格关怀但是亦弗是耐亲娘阿姐弗会得乱伦格，迪种样子格三结合假使再加上仔顶尖格床浪功夫末实在是天浪少有人间绝无！

正勒浪朱司务情不自禁痴心妄想格辰光，只见董娘娘掩口莞尔一笑。迪格当口，耐董娘娘好笑格？朱司务本来已经人木脱格哉，再拨耐一笑百媚生格是要颠倒众生。正勒浪朱司务弗晓得自家阿要蠢蠢欲动阿会得做出啥越轨行为格辰光，只觉得一样物事黑乎乎格扑面而来。“啪”格一记，阿壳张吃仔一记耳光呀。低头一看末，地浪向自家格一本画册。抬头一看末，祖师面色铁板显露不悦。晓得自家心动神知，格是瞒弗过仙人格。所以要吃生活，格是惩罚我非分之想。再定睛一看末，叫啥董娘娘已经影踪全无。

仙人面孔板板，又开出口来：董娘娘的面容，可记得否？朱司务想，我倒想讲还弗曾看明白拉里，阿好让我再看看。自家晓得格是弗可能格，就老老实实恭恭敬敬回答一声：是格，已经记明白了。格末就叫做朱司务格本事——一级画工呀。

“当真？”

“当真。”

“既然如此，你且听了——天亮之后你速将董娘娘画像完工，待等三年之后携带进京自有效验。”

朱司务正要想问阿有啥等样格效验呢，只见吕仙说完要走，急忙上前想要拦牢问问清爽末，阿晓得一脚踏空。再一看末，自家复回尘世，原来是南柯一梦。

梦虽然醒哉，不过人仍旧勒浪梦里头弗肯退出来呀。耐看，一本画册明明是勒浪地板浪向躺好仔点。想起仔吕仙关照格任务，仔仔细细回想一番董娘娘的音容笑貌服饰打扮，面孔也弗揩早饭也弗吃马上台子摊开来，笔墨端正好。用用心心一口气拿迪张画像画好。自家看看觉得正称得上得意之作。为啥呢？一是用心，功夫化仔下去！二是上劲，欢喜做格事体搭仔为仔柴米油盐开伙仓当然是绝然弗同。画末是画好仔，倒是弗敢挂出来，只好勒浪夜深人静格辰光有趟把从箱子里拿出来看看过过干瘾。秀色可餐，看看也好格啊。

一等等仔三年。朱司务牢牢记住吕祖格关照，一到辰光收摊打烊。对别人只讲要出门去旅游。别人也弗晓得究竟会有啥花样经，想来俚赚够仔银子末，动仔游兴哉。

朱司务一路搭乘运河航船到通州上岸。有任务在身，也弗敢去想啥格顺带便游山玩水。格格一日到仔京城，落脚勒浪苏州会馆。

自家也弗晓得到底仙人要俚迪歇辰光到京城来作啥。不过，人既然已经来格哉——既来之则安之。倒也定定心心。准备明朝去打听打听琉璃厂什刹海大栅栏哪哼格走法，可以安排安排一个旅游计划。前清格歇辰光，皇宫——现在叫故宫搭仔圆明园（现在格圆明园废墟）还有天坛等歇场化老百姓是弗允许进去格。

阿壳张第二天一早起来，苏州会馆里向大家议论纷纷。在勒浪讲非比寻常格一桩事体——顺治皇帝格皇贵妃董鄂氏不幸因病仙逝。本来嘛，后宫里向死脱个把女人谈弗上是啥大事体，也弗是贵为国母格皇后娘娘。

朱司务耳朵半边豁着一个董字嘛，倒着进耳朵哉。啊？！阿会得是董娘娘介？！耐末弗去打听啥格琉璃厂什刹海大栅栏哉。竖好仔格耳朵仔仔细细格听下去。

（弹唱）
叫啥子末希奇希奇真希奇，
格桩事体前朝六代未曾闻。
迪位董鄂氏出身秦淮河，
（说表：原来俚乃是秦淮八艳之一。）
董小宛三字名气响得来斜斜能。
辗转进入皇宫内，
太后身旁侍晨昏。
少年天子偶得遇，
一见倾心惊天人！
从此君王有知音，
心心相印共鸳枕。
（说表：有仔红颜知己哉，“长信宫中，三千第一”“昭阳殿里，八百无双”。）
真是六宫粉黛无颜色，
三千宠爱在一身。
谁知天不从人愿，
膏盲之疾临宫门。
不幸一病身亡故，
多情皇上哭断魂。
千呼万唤唤不归，
“端敬皇后”来追尊。
（说表：叫啥前朝崇祯皇帝辰光出仔一格扬州瘦马田贵妃，现在超出，秦淮歌妓当中出仔一个皇后娘娘！）
惟有一事为遗憾——
未有画像伴余生。

（说表）格格皇帝啊，除开议定镒号孝献庄和至德宣仁温惠有十格字之多，别样格脑筋挖空心思动出来全部办得到，葬礼要多少隆重就办到多少隆重。董娘娘黄泉之下要人服侍，三十名宫女太监殉葬，格是残酷啊。要有地方住，专门盛饰奇珍异宝格一座精舍付之一炬。迪格就是满洲贵族丧葬习俗里格“大丢纸”。还弗算数， “大丢纸”之外还有“小丢纸”——就是拿董娘娘生前睡眠服御之物统统烧脱。桂圆大格珍珠指头大格宝石尽皆焚化。一眼眼也弗肉痛哎。

但是，就是有一桩事体嘛，铜钿银子再多也唔没办法可想。就是董娘娘格喜容唔拨着落。董娘娘生前也弗曾留下来啥格画像。耐末只好想格极办法——叫董娘娘生前所住承乾宫里弗曾殉葬格宫女太监统统召集勒一道提供信息，再汇集京城有名气格画工大家一道来根据提供格信息来描画。阿有啥就像仔公安局里画嫌疑犯一式一样哉。

一眼弗错，格末也像仔公安局画嫌疑犯是弗可能画得像到落里去格。耐倒想想看，大家七嘴八舌，迪格讲眉毛要迪能弯过来，伊格讲眼睛要格能瞄过去。耐是苦煞仔迪班画工，也弗好罢工格。偏偏是好弗容易大多数人讲蛮像哉，皇帝跑过来一看，仍旧弗称心呀。气得皇帝发闲话——再画弗好，要对捺弗起哉。承乾宫里是一片哀号，弗晓得画画迪种事体越急越弗来三。眼看是要唔不戏唱哉。

朱司务听仔末，耐末开心啊。原来吕祖掐算阴阳老早就晓得董娘娘寿限，三年之前就安排好哉。格是便当煞格，画箱里拿出来就是！完成仔吕祖交待的任务，同时也是做桩救苦救难格好事体。倒是要打听一条路子，自家是弗好直逼逼到金銮殿去见皇上格。

朱司务一打听嘛，倒是凑巧——奉旨根据“御制端敬皇后行状”写传记格金三俊金中堂也是苏州地界吴江人。通过仔格苏州会馆到金中堂府浪，金大人一听之下就讲：豪臊拿出来瞻仰瞻仰。一见之下耐末确实相信。为啥？迪幅画像有灵气格，顾盼自如栩栩如生活脱活像一格活人立勒浪面前。再一想末，还有吕洞宾吕仙格指点，绝对放心好哉。迪格事体弗好寻开心呀。万一送上去，一眼弗像格是惹毛皇帝弗得了呀。现在定心哉。

果然弗出所料，金三俊拿董娘娘格画像上呈御前，皇帝一看末破涕为笑，惊喜莫名。马上传示六宫，叫啥唔不一格人表示疑义，异口同声讲像，像，像得弗得了啊！

其实末，耐皇帝老倌已经讲仔像末老早通过哉，大家顺水推舟何必说弗呢。马上顺治传旨重赏朱司务。赏格是“奉特旨授为内阁中书”——内阁中书是可以参与机务格，有权柄格。啥人晓得朱司务并弗领情呀，对来传旨格金三俊讲要辞官弗做——理由便是“弗懂得哪哼做官”。倒也有道理呀，其实俚耐自家有数，做官啥介好做格？弗要爬得高跌得重！

金三俊晓得俚格心思，自家替皇帝办好迪件大事体也是朱司务格来头格是无论如何要帮伊忙格。明朝早朝格辰光，上朝宛转对皇帝讲仔朱司务只求富弗求贵格心思，皇帝照准。改赏一万两银子拨拉朱司务。

朱司务得到格实惠还弗仅仅是到此为止。衣锦荣归外加还有四个字——就是前一腔一档电视节目格名称——名声大振。弗论远近特别是有铜钿有身价格人家板要来请朱司务，酬金还要别苗头。为啥么？皇帝出仔一万两银子，我伲出弗到一万，打格一折末起码起码也要出到一千。有格再往上抬抬末，快煞仔哎，弗到半年润笔之资已经今生迪世用弗光哉。

朱司务就此歇业，搭仔俚格恩公吕仙一样云游四方。据蒲松龄老先生讲勒浪山东莱芜有一位朱拱奎曾见其人。究竟哪哼，尚有待考证。

短篇到此结束。请听下档。
_________________
是非是，我非我。

敬请光临我在北美枫的博客飞云浦

也请关注我的新浪博客
http://blog.sina.com.cn/u/1740799031